आकाशाची अथांग
निळाई,
एकदा डोळ्यांत शोषून घ्यायाचीये;
अन त्या निळ्या डोळ्यांनी,
ढगांची मऊ मऊ स्वप्नं पहायचीयेत...
घोळवायचय
गळ्यामध्ये,
एकदा झऱ्याचं झुळझुळणं;
अनाम कुणाच्या ओढीनं,
एकसंध वाहत राहणं...
समुद्राच्या लाटांचा
आवाज,
कानांमध्ये भरून घ्यायचाय;
मनाला पूर्ण मोकळं
करून,
त्याच्यामध्ये साठवायचाय...
मोठ्या, उजाड
माळरानावरचा,
एकटा पिंपळ व्ह्यायचय एकदा;
व्यापून टाकणाऱ्या
शांततेत,
एकटंच सळसळायचय एकदा...
कुणासाठी तरी एकदा,
उंच एखाद्या कड्यावरून,
धबधब्यासारखं
झोकून द्यायचय;
टोकदार, माजुर्ड्या
खडकांवर,
निर्भीडपणे
कोसळायचय...
भल्यामोठ्या
घराच्या, कुठल्याशा कोपऱ्यामधला,
कच्च अंधार व्ह्यायचय एकदा;
अन भीती बनून
कुणाच्यातरी,
मनाला वेढून
घ्यायचय एकदा...
अवसेच्या अंधाऱ्या
रात्रीशी एकदा,
चांदण्या होऊन बोलायचय;
आपल्या फक्त अस्तित्वानं,
तिला मोहरून टाकायचंय...
कुठल्याशा वेड्या
कवीची,
अनाम कविता व्ह्यायचय एकदा;
अन वाचणाऱ्या
प्रत्येकाला,
हळुवार कवेत घ्यायचय एकदा...